உச்சநீதிமன்றத் தலைமை நீதிபதி சூர்யகாந்தை நேரில் சந்தித்து முறையிடப் போவதாக காங்கிரஸ் தலைவர் மல்லிகார்ஜுன கார்கேவும், மக்களவை எதிர்க்கட்சித் தலைவர் ராகுல் காந்தியும் தெரிவித்திருந்த நிலையில், அவர்களைச் சந்திக்கத் தலைமை நீதிபதி மறுத்துவிட்டதாகத் தகவல் வெளியாகியுள்ளது.

தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி, கரப்பான்பூச்சி ஜனதா கட்சியினரும் பல்வேறு மாணவர் அமைப்பினரும் டெல்லியில் போராட்டம் நடத்தி வருகின்றனர். இவர்களுக்கு ஆதரவாகக் காங்கிரஸ், இடதுசாரிக் கட்சிகள், திரிணமூல் காங்கிரஸ் உள்ளிட்ட இந்தியா கூட்டணியில் இடம்பெற்றுள்ள கட்சிகளின் தலைவர்கள் போராட்டத்தில் ஈடுபட்டு வருகின்றனர்.

இந்தச் சூழலில், நாடு முழுவதும் வாக்காளர் பட்டியலில் நடைபெற்றதாகக் கூறப்படும் முறைகேடுகள், எஸ்ஐஆர் நடைமுறையில் தேர்தல் ஆணையத்தின் செயல்பாடுகள், ஜந்தர் மந்தரில் போராட்டம் நடத்திய மாணவர்கள் மீது காவல்துறையினர் மேற்கொண்ட நடவடிக்கைகள் உள்ளிட்ட விவகாரங்கள் தொடர்பாக உச்சநீதிமன்றத் தலைமை நீதிபதி சூர்யகாந்தை நேரில் சந்தித்து முறையிடப் போவதாகக் காங்கிரஸ் தலைவர் மல்லிகார்ஜுன கார்கேவும், மக்களவை எதிர்க்கட்சித் தலைவர் ராகுல் காந்தியும் தெரிவித்திருந்தனர்.

இதையும் படிங்க: பிறர் சொல்வதை அப்படியே ஏற்காமல், சுயமாக சிந்திக்க வேண்டும்!! மாணவர்களுக்கு ராகுல் காந்தி அட்வைஸ்..!!

தலைமை நீதிபதியுடனான சந்திப்பு இன்று மாலை நடைபெறும் என்று கார்கே தெரிவித்திருந்தார். இதற்கிடையே, ராகுல் காந்தி தனது எக்ஸ் தளத்தில் வீடியோ ஒன்றை வெளியிட்டுள்ளார். அதில், தலைமைத் தேர்தல் ஆணையர் ஞானேஷ் குமார் பதவி விலக வேண்டும், எஸ்ஐஆர் நடைமுறை ரத்து செய்யப்பட வேண்டும் உள்ளிட்ட கோரிக்கைகளை வலியுறுத்தி இன்று உச்சநீதிமன்றத்தை நோக்கிப் பேரணியாகச் செல்ல உள்ளதாக அறிவித்துள்ளார்.

இந்தப் பேரணியில் ஜனநாயகத்தின் மீது நம்பிக்கை கொண்ட அனைத்து இளைஞர்களும், அரசியல் கட்சியினரும், சமூக அமைப்புகளைச் சேர்ந்தவர்களும் பங்கேற்க வேண்டும் என்றும் ராகுல் காந்தி அழைப்பு விடுத்துள்ளார். இந்திய அரசியலமைப்பின் மீது நம்பிக்கை கொண்டவர்களும், அதைப் பாதுகாக்க விரும்புபவர்களும் தங்களுடன் பேரணியில் பங்கேற்கலாம் என்றும், இதில் பங்கேற்க யாரும் அஞ்சத் தேவையில்லை என்றும் அவர் தெரிவித்துள்ளார்.

இதற்கிடையே, எதிர்க்கட்சித் தலைவர்கள் முறையிடத் திட்டமிட்டுள்ள விவகாரங்கள் அனைத்தும் ஏற்கெனவே உச்சநீதிமன்றத்தில் விசாரணையில் இருப்பதால், இந்தச் சந்திப்புக்கு தலைமை நீதிபதி ஒப்புதல் அளிக்கவில்லை எனத் தகவல் வெளியாகியுள்ளது.

அரசின் செயல்பாடுகளில் தலையிடுவதற்கான நிர்வாக அதிகாரம் உச்சநீதிமன்றத்துக்கு இல்லை என்றும், தலைமை நீதிபதியிடம் நிர்வாக ரீதியாக மனு அளிப்பதன் மூலம் இதுபோன்ற விவகாரங்களில் உத்தரவுகளைப் பெற முடியாது என்றும் தலைமை நீதிபதி தரப்பில் தெரிவிக்கப்பட்டுள்ளதாகக் கூறப்படுகிறது.

அதேநேரத்தில், இந்த விவகாரங்களில் உரிய நிவாரணம் கோரி, சட்ட நடைமுறைகளின்படி உச்சநீதிமன்றத்தை அணுக எதிர்க்கட்சித் தலைவர்களுக்கு உரிமை உள்ளது என்றும் தலைமை நீதிபதி தரப்பில் விளக்கம் அளிக்கப்பட்டுள்ளதாகத் தகவல் வெளியாகியுள்ளது.

இதையும் படிங்க: "ஒருபோதும் பின் வாங்க மாட்டோம்"..! இன்னும் எத்தனை ஆயிரம் போலீஸ் இறக்குவீங்க..? ராகுல் காந்தி ON FIRE..!